Zu spater Stund hämmer eus am Mäntig in Wetzike zumene witere Plauschmatsch igfunde.
D'Stimmig isch scho i dä Kabine guet gsi. Au während em Ilaufe hät euses Team uf mich en konzentrierte Idruck gmacht und parat gwürkt. Am halbi zähni isch dänn los gange und wie parat mer sind, hätt scho de erscht isatz vo eus zeiget und nume sekunde nach em apfiff hätts im netz vo de Pens gschället. Mir sind au i de Folg die spilbestimmend Mannschaft gsi und vor allem euse erscht Block hätt teilwis mit traumhafte Kombinatione ufgwartet. Us eusem Schanceplus hämmer aber bis zum Pausetee lediglich en 2:0 Vorteil chönne useschaffe und mir sind mit eme, user minere Sicht zu knappe, Vorsprung i d'Pause verschwunde.
I de zweite Halbzit hämmer dänn kontinuierlich euse Vorsprung usbout. Z'erwähne isch debi, dass mir drü vo vier Goal via Shorthander erziehlt händ und mir's sogar gschafft händ, während einere Straf gäge eus zwei Shorthander z'erziele (zwei Mal Christian uf de Strafbank). Wänn das mit de Strafe so witer gaht, han ich dänn endli au emal e Schance, inere Rubrik dä Leader z'si (Adi und Trisi münd ufpasse). Dä Andi isch im Goal wi immer en sichere Wert gsi und s'isch schad gsi, dass mir's ihm nöd händ chöne hälfe, zumene Shutout z'cho. Sini Leischtig hettis verdient gha.
Au i dem Spiel isch eusi Plauschmannschaft nöd z'bezwinge und mit eme ungfährdete 6:2 Sieg simmer am viertel ab elfi schiesslich zfride i'd Kabine abzottlet und händ euse Erfolg zelebriert. Dasmal leider ohni Bier.
Geschrieben von Christian